PUTRU SANGASKARA
Om Avighnamastu !
Sahananta Pandhita magawe brata sakwehnya, nguniweh wolaka wrreti kalawan janma manusha, nihan hulun patenanta, hangucap Sang Shangaskara, kari huwuh huwah rare tininggalan dening kawitan, ya ta kadhang paman, sanakkula gotrangku tan hana mwang sanakku sampun mapasah marabya pet parananya, apan anghing mangkana ling ira mpu hawu.
Ibu bapa paran teki panawurang kwi hutangku, lalis sakaring tuwuhku, hita parananya sih ta, nguni dhuk sedengku rare linggan hulun, tinadhahan sharirangku, binebedan binarut kinudhang kudhang dinarmhaken, sinotaken sangkanku, tka ta aku ri ngatuha, hingabenaken pakwewuh, pinerastha aku pinilepas, kaswahanta aku padruwehan, mwang pirak, rajayogya wenang wenang rare hulun, ya teku hutangku maha bhara lewih saka ring mas manik, sabhumi mahameru, hagunge hutangku hurip.
I yayah ibungku kita khalih, kadhita aku mas manik, puji akna ring shariranta, tuhwaku bhakti ring kita, pangastawangku ring Sanghyang, sakwehta gumawe bratta, nguniweh ring dengen sanak, lor wetan kidul kulon. I sori ruhurimanya sira kabeh hingastuti, sira pinuja rahina wengi, hamalar malar kapanggiha sira hamawaha maring kahyangan, teke ri yayah ibu, tan urung anuruwehan.
Haywa lali denta kahidep, yatika kapanggihanta bhawa laksananta muja, ngken angkuh ghenta ghenti gentaraken umung kabeh kangastuti, shabdaning watek dewata, pangastuti nireng mantra. Umung humreng mantranira, kadi wainarah warah kiteng awan. Yen hana ring catur lokha, winarah kita ring swargga, yan hana ring kadewatan, tama akna ring kahyangan, pratingkahing sinangguh lepas teke keneng swargga hanaku.
Sang Sangaskara pamastu saking kurunganta, shawanta kari magilang, sawanku sigloglo, molah yani ngulahaken, lumaku yan linakwaken, kadi ta hulah ning hulun, mangen angen hikang janma, kadi wihangiking dadi hamitlu mampah tang hulun, maraha kadewatan, tumuli ring kahyangan, mangkana lingira huwus.
Tumuli Sang Sangaskara tan pamangan, tan paturu, mangen angen sang kawitan, ya ta kita doning dateng ring sang pandhita, dadi ta pinarah Sanghyang Dharma Wisesa, lawan tatwaning janma, lpas sangke sangsara, pakaryaakna puspha linggha, pujhakna pusphajati, patalangkupi tangan kalih, sira kadi puspa jhati, ikang sekar glaranta, ta mujha harsha jhati, shabdanta merdhu khomala, sarining kusuma jhati yatika pujaknanta ri Bhatara guru, dendenakteha ngastuti, tutur tutur haywa lupa, hinget hinget haywo lali, yangken panggung kang bhuwana, maka tapakan pretiwi, maka tatali hambara, maka tatali lilha ambhara, maka klir sunyya taya, dhamarta raditya wulan, sangawayang ring sharira, sanganguda hyang pramanha, umida de Sanghyang Wisesha, sangangudang paramartha, amreddhaken tang jnana, muksha tanpa amangan, mulih maraha ring shunnya matangyan Sang Sangaskara sira hetuning malara, mahangen hangen hikang janma, kasesitan wurung mati, mati tan wurung sangsara, minanganing sarwwa satta, hasu gagak lawan hulung, padha rowangnya kasihan, kharaning hulun kawelas, mangkana lingira mpuhawu, tuminggal sira irika, sekar ring kahyanganira, irika ring banjaran kembang, kahyanganira mpu hembang, dhateng sira hangadeg, ri harep Sang Sangaskara, mangkana lingira mpu hawu, anaku Sang Sangaskara, haywo kita kajenekakentumangisi kurunganta, sira padha ning mati, kadi kalananingpisang piyakaning tebu, tumibha ring hawaknya, mangkana purihing dadi, kita rika apan rare, nahan sang tapaheng wukir, sumandha ring witning taru, abratta sira, salwiring bratanira, phatrahara sira, hamutung ron don, dharpapahara, amangan kukus, anungsang hana mangguh mataliwangking sumampir, hamangan pah mwang bhayu, mangkana lwiring bratta, ya ta wenang amastuha, humhura lawan shawannya, tan hana mangkana juga, meweh kang mokshaheng raga, matangyan Sang Sangaskara matelasan kiteng lara, tumingisi kurunganta.
Anakku Sang Sangaskara, balikan tulusaken phunyanta, ring madhyapadha, denta megawe Dharmma, makinkin hambek rahayu, magawe Dharmma sakala, ni ya ta sakala niskala kapanggih denta, denta sih ri padanta janma buddhi swara legha manah, dinuluranta suka, suka manah ambek lila hening, mangke wotinulusaken lakunta manuruweyan, datenge ring kadewatan, lumaku magawe hayu, ring Shiwa padma mandala, teke ring swarggha maya, hameta hayu, mwang bapanta ibunta, kumirimakna caru, Suligidyus Kamaligi, kalawan bubur sasuru, pasungante wangatuha, kanelingira mpu embang, sira ngucap paramartha.
Tamiyan Sang Sangaskara, mangkat sira nuruweyan, umidepakna pawekas, shabdanira mpu embang, yatika ri hidepira, mangkat sira nuruwehan, lumampah Sang Sangaskara lungha ngetan larinira.
Tan marma suwe ring awan, dateng sira ri suruweyan, amanggih sira pitara, salakistri hakuru haking, sadingding tinampatampa hanngrereng tekek, magilang gilang sawanya, atyanta sangsara dahat, mandeg ta Sang Sangaskara, neher ta sira hatetakon, hatakon paramartha, pajare galintung, hangeras manah hetu tuminggal.
Warahen hulun mpu lingira Sang Sangaskara. Sumahur ta Sang Pitara, paranta lingta karenge, kang tinakonakna hika, ika tegal bayangan, pamasahaningta wungsu, paraning mati sangsara sang durung kinamaligen, kang durung ginawe hayu, tingali ta kami mangke hangawu bi waduri ragas, hasanding palungan rumpung, hangarepaken ronabing limastun hana hisine, hentisbit tanpa lamak, tuminggal lipinggiring ghoh, tinakep ruhuring banyu, dak sengguh skul kahili, harah sawetning denepapangku, hapan tan hana hangirim, horatana dagingku, he ring ta aku mawaraha, ngwang krangan kami anaku, mhati tan manemu hayu, mhati hamanggi sangsara, hanghe ring tegal neraka, nahan ujar Sang Pitara.
Kami atakon anaku, ndi ta rikhasinangkanta, mantangen tan wruhing kene, tan salah hiku wuwusta, saking toya padatheng ingsun, Sang Sangaskara haranku lumaku magawe hayu, ring Shiwa padha padma mandhala, ya don kwanuruweyan, hahyun wruha ring nggoning mhati, hangen ta sa akne phapa, kumirimakna caru, Suligidyus Kamaligi, khalawan bubur sasuru, sukha ngakneng tuha tuha, nahan ling Sang Sangaskara.
Sumahur ta Sang Pitara, atyanta Sang Sangaskara, iku mahabara nira, wruh ri kramaning dadi wwang, wruh ri kramaning ngahurip, wruh ri kramaning mhukti, hashih ri padha nta janma, rame buddhi lege manah, yadyantanasih haki ring nistha, tanpa ngakwan anaking hanak, tanpa mras kwi ngananaking wong, tanpa dhana tanpa punya, tan hasihing padha ngku janma, tan sumembah ring sang wiku, ya ta ika pinaka pamangku, hana drawedak tengetku, maka awak stri raja yogya, wenang wenang rareng hulun, walingku wawangku mhati, ta hakapo tan mangkana sanga hurip hamisesha ya, angalapa druwening mhati.
Matangyang Sang Sangaskara, haywo gumuguting dewru, kunang prayoganya dhana akna, mras sidhaning dadi wwang, kapanggih ri niskalanta, kapanggihaning sadhana.
Anaku Sang Sangaskara, tulusakna purnyanta, den tuhu magawe dharmma, hasih ri padhanta janma, tathapi sang dibya brata, kita hasihe ri kami, hangentasakne phapa, hangruwata dashamala, dyus ta aku ring kamaligi, nahan ling sang krangan.
Tami yan Sang Sangaskara, udhuh kaki Sang Pitara, hajwo kita ta sangsaya, hingsun hangrwat ta phapa, hingsun dyus sira ring kamaligi, shinucenira sinangka manen, sinikem tang bhayu sabdha hidhep, tutur hidep janma jati, kashaktinika pamandi, byakta sira tan suwe, rep ta hilang tanpa rasa sang sinanmata, sang dibya brata, lumampah ta sira padha, Sang Sangaskara lungha mangetan, lari nira.
Tan marma suwe ring awan, tke ta sira ri tgal loma kahyangan, bhayapadha kari ning alas, yan tan winehan saji, mandeg ta sang sanghaskara, hangrungu prabhawa, prakasha karuna dennya, karu i ri sor i ruhur, maha prabhawa, walingira mpu hawu, jeg larape katon gumawang, karenge halyu sadulur pater, haliwarwar hudan raja, yangika padha manaput, dumamaking Sang Sangaskara, kadi hayam keneng pilar, hatutur sire wkas, hanglilir hangangut tanggut, hatalangku matangan kalih, irika sira mpu hawu, isangibu bapa, malaku tulunghaka kari yayah, wuta, tiki wetan, kidul, gumenter kulon, lawan lor, peteng ri sori ruhur, paranta rehe mangkana, hidepe gane hala, punyangku ring madyapada, matangyan tan tulus saha meta bapa lan ibu, aah bhatara kamung hyang, sakweh ta watek dewata, mangkana lingira mpu hawu.
Hempu hempu rahadyanku, Bhatara Sangkala, munggah kiteng sariranku, matangyan mangke phapangku, alawa kumisan misan, donku kapwa huripa, mangkana Bhatara widhi, tumingkahing kasesingku, matangyan mangke hawan huwus, awuwus haranika, satata tanpa wemenak, ni hyang manggih sangsara, matangen widhi panglapus, yan mati yan huripa, mangkana Sang Sangaskara.
Kocapa sira Kaki Patuk, tuminggal sira irika, saka ring kahyangan ira, irika kang suroweyan, kahyangan ira Kaki Patuk, hingutus den bhatara sumungsunga sangagawe hayu, kang bhakti ring wwangatuha tuha, ya ta donira tumurun, dhateng ta sira tke mangadeg, ri harep Sang Sangaskara, kawahiteng hanom bhakti, satinggal Sang Sangaskara, hanembahan hatangis, nihan ling nira mpu hawu.
Hempu hempu rahadyanku, ya dewata rika kita, kaki buyut ibu bapa, ri kata kita apilayala sakeng rika warahen tang hulun, ling ira Sang Sangaskara mangkana.
Sumahura Kaki Patuk, putungku Sang Sangaskara, tan kami dewata, tan kami ibu bapanta, kami hyang suruwehan, nira Kaki Patukanku, kami hingutus, de Bhatara sumungsang sangagawe hayu, kang bhakti ring tuha tuhanya, ya ta donku, tumurun, kawahita hanom bhakti, kapanggihing kene ri kasuruweyan, ndi ta paranira mangke, mangkana lingira Kaki Patuk.
Sumahur Sang Sangaskara, hingsun datanga ring swarggha, hameta ra bapa ibunku kumiri akna caru Suligidyus Kamaligi, kalawan bubur sasuru, sunasung ring wwong atuha tuhangku.
Sumawura Kaki Patuk, putungku Sang Sangaskara, panganaken sawijining hulun, kangayam hinaritan, tan kari sambel pedes, kalawan sajeng ring pucung, lan sekul ring kumarang, iku ta sagihana akna.
Sumawur Sang Sangaskara, wonten kaki sajinira, wus padhang shampun sumaji, lah singong mangkwanga ta ra, wastu hamanggih hayu, haja kabet dena glis, narapyak teke ring paran, mah pasungangkwi kita canggah trisula ta ngaranya, kapawitraning sang wiku, tke naken denta putu, yogya panulakan bhayu, kalambhi hantakusuma, pasung bhatara ring hulun, kalambihaken denta putu.
Putungku Sang Sangaskara, mawarahang kwi kita, wwong krangan kami kita, huni duking madhyapadha, kumingkinta kurahayu, ndan kretta punyangkwi nguni, budhi swara legha manah, hasih ri padhanya janma, haweha mangan ring wwag hanginangdak duluri legha manah, tanpa mule sarwwa dhala, marggha mwang pegating wet pecat, yatika dak pahayu, sing tumibha ring hawan, dak jumput dak simparaken, tirtha marggha taya, sangku ika sangkanku rahayu, tuminggal padha bhatara ri polah kura hayu, ya ta panugrahin ira kalambhi hantakusuma, kalawan canggah trisula, kalawan wineh henggonku ring kene kang suruweyan, henggonku de bhatara, i wruhanta Sang Sangaskara, ling ira Kaki Patuk.
Tanggeh yan wuwusan, lah talu mampah dena glis, lumampah Sang Sangaskara, lungha ngetan lari nira, tan marma swe ring hawan, tka ta sireng halas, gung senet peteng, hampel rampalan ring petung watang, pring sayoga manah, pandan wong akeh aglar, halang halang ron kadga, hendut siblagdabah, ya ta kapanggih den ira, mandeg ta sira sakareng, neher ta sira atakon ri sira Kaki Patuk.
Kaki paran parane iki, warahen ingsun kaki. Sumawur Kaki Patuk, halas gung senet peteng, ares manahe tuminggal. Putungku Sang Sangaskara mangke kami hawaraha, kang tinakon naken sira, yeki maha wirawan pasenggahen iki putu, kang halas gung gumegeng, dak warah malane nguni, wwang mati ika, hampel rampalan ring watang, husunganing mati ika, mwah kang pring lawan petung ika husunganing mati ika, halang halang ron kadga, rambuting wwong mati ika, singlagdabah ika, tahining wwong mati ika, padha matemahan halas agung gumegeng, amepet mangke dadalan, nora samban dadalan kewuhan kita mutu, yatanya kami mawaraha ri katatwanya, kunang ika katatawanya, hehi skul ring piring, kalawan bubur pirata, neher sinawataranya, pawedha kita pamantra, tawuri sekarura, lawan wija catur warna, dendenak denira yogha samadhi, mangkana ta laksananta, lingira Kaki Patuk.
Hamiyos Sang Sangaskara, umidepakna wkas ira Kaki Patuk, hanibakaken saji saji kang bubur pirata, neher sinawataranya, hawedha mantra, Ongkara, hana wuris karura, lawan wija catur warna, yinogan sira, mandhang maring sarira, lekas ira tan suwe, rep hilang muksha maring sunnya, sakweh nikang paramaha wirawan, shakti nikang madhu jati, matemahan dadi padhang, muwa humangka ta sira, mangke hawanira, lumampah Sang Sangaskara, lungha ngetan lampah ira.
Tan marma suwe ring awan, teke ta sira ri tegal hagho, lebunya panes tan sipi ya, tan hana kayu kayu tumuwuh, nanghing dukut mrakladalangalang, adoh lor adoh kidul, hendep hendep namu namu, hamanggih ta sira pitara, atyanta sangsaranya, akuruhaking hanggirih, magilang gilang ring hawan.
Mandeg ta Sang Sangaskara mawala sira tuminggal, ta nerang sira hanagis, tur mandarana kulit, winungu nira tang hatma, neher tinakon takon shabda nira hawor tangis, nihan lingira mpu hawu. Mpu mpu rahadyanku ndi ta haraneki, waraha ta ingsun kaki, sumawur ta Sang Pitara, mapatalingnyakarenge, kang tinakon takonira, hingkene tegal neraka, mangke ta kita weruha, kami sangandyan sang ragan ngaranku ring madhyapadha, mangkana sabdha nikang pitara, hidepku kawotan kita tan len kitamba baneh, pamanku sira sangandyan, ntan weruh sirikasih raringsun, hingsun Sang Sangaskara, wkanira sang rat bhumi, saking toya padha tengsun, lumaku magawe hayu, ring Shiwa padma mandala, hangentasakna wwangatwa, kumirimakna caru, suligyadyus kamaligi, kalawan bubur sasuru, sungakna tuhatungku, ya don kuma kuruweyan, harep weruha ring nggoningsun paman, nggonira bapa ibu, linging Sang Sangaskara.
Sumawur ta Sang Pitara, anaku Sang Sangaskara, hidepku kawotan sira, wkanira sang ratbhumi, hapunggung kami hanaku, tan weruh ri nggone ramanta, tan weruh kwing kadewatan, tan weruh kwing swarggha, anghing hingkene nggonku ring tegal neraka, kang kepanggih denya anaku Sang Sangaskara, hajakta denta aku, samadhita sahabana, lumaku magawe hayu, ring Shiwa padma mandhala, hangentas wwangatuha tuha kumirim akna caru, Suligidyus Kamaligi, kalawan bubur sasuru, sukne tuha tuha, ya don kunuruweyan, hahyun weruha ring nggoning mati, waraken mangke hingsun paman, hajakta hunihana samadhi sahabana, lumaku magawe hayu, narapwan mentaskami papa, anuwu sakwehing drwe we mas pirak, stri raja yogya, wenang wenang eareng hulun, huwus dak pras, daksitulus, mangke humalesa ring wwangatuha tuha, lumaku magawe hayu, mangkana lingira sangandyan.
Sumahur Sang Sangaskara, uduh pamanku sangandyan, mangke kami ta waraha, kutila hambek anakta, umantu kang paksabarat, ta yeng pratiwyakasha, ta yeng hyang ta yeng dewata, uwah ya acaru caruha, hana ya angken glar puja, muwah ta yeng wwangatuha tuha, hamrasa gawe hayu, tan kpahan ri sang wiku, sang resi shewa sogata, mhuda mange ring pitutur, apa ta den kwangajaka, iwruhanta paman sangandyan, kunang rika ya ambekingwang, ta hasyaku yan mangkana, sawarahing wwang tuha tuha, rahayu rikwa ambeking wwang, rahayu kapanggih, hagung halit rakwa renyaning wwang, hagung halit kapanggihanya, ya ta ri hidep ning hulun, sapa warahing wwongatuha tuha, kapanggih posire ngkene paman, irike tgal neraka, sangsara hakuru haking, phapaning tan kinasihaning dening hanak, dadi panglawunta manahta, haweta kita sangsara, mentas saking phapa, masa ta kita agaweya hayu. ling ira Sang Sangaskara mangkana.
Sumahur sangandyan, mangkana ta gane polahnya, sapa gane tirune norasyaku mangkana, katuwon kang pinaka anak, tanasihing wwangatuha tuha, ta ya manah ri kami, mungkuraken jnana tinut, tan eling ing sangkan paran, tan eling ring guru kamulan, kamulane dadi janma, hah rah sawetning papangku, tan kinasihan ning anak, hana teki papadhanya, kadi papate ning hasu sato celeng kbo sapi, mhati tan ginawe hayu, yatika padhanya, ta hawaku hamalinganumpung, angalap druwening kabuyutan, kawratta shabda kuhala, tan dehta kihanucapen.
Anaku Sang Sangaskara, kita asiha ri kami, anganta sakna phapa, ling ira sira sangandyan, sumahur sira Sang Sangaskara, pamanku sira sangandyan, haywo sira sangshaya, hingsun hangentas akna wwangatuha tuha phapa, mah ta skul ta ring piring, pineh te kang bhayu hidep, marmani kang ngilanging phapa, repnya ta hilang tikang phapa, dening bhayu manu jati, muwahumangka ta sira, les lumampah Sang Sangaskara, lungha ngetan lari nira, hamanggih ta sira gunung magibya, tan sipi kahanan, lwir dewa suksma, brega mhatiya ngipi, mhati sinawuting hula, mhati sinambering gelap, mhati dinemaking macan, mhati kacarik, kapangawan nika kabeh, padha ika paphanya, haja tinut kang mangidul, kalaning mhati maring Yamaniloka ika, kalaning Yamani, kang dalan maring kawah, akiri sakilamaya, sarwwa ghanda hanengkana, hingukup sandining dhupa, mhrebuk harum hambhunika, dandan bancana ika putu, pawaking sarwwa phapa.
Haja tinuha kang lor kulon, dalaning putralaya ngaranya, histri mhati hanakhanak, phapawane hika haja tinut kang mangulon bner, dalaning curigalaya, histri mhati hapatram, phapawane hika, haja tinut kidul kulon, dalaning hasalahlaya, salahlaya ngaranya kang mhati salah pati, mhati tiba mamanek, muta humangka kang mangetan, dalaning hatoya laya, hatoyalaya ngaranya, kang mhati malabuh hera, phapa waneh hika, haja tinut kang lor wetan, dalaning hatarulaya, tarulaya ngaranya, kang mhati jajaka lara, phapa waneh hika, haja tinut kang lor bner, dalaning hasulaya, hasulaya ngaranya, kang mhati prangapijer, phapa waneh hika, diptaning janma, wruh ta kadi kramaning janma mahurip, wruh ta karmaning mukti, sakalanta niskalanta, madhana juga krawa punya, mhasih ta madanta janma, shadu buddhi sora legha manah, ah wah mangan kita ring padhanta janma kaluwen, dinuluran manah sukha legha hambeka sira, yan mangkana, atyanta maha ngaranira dadi janma dlahan.
Putungku Sang Sangaskara, dak tuduhaken ta ring dadalan, kang margha hala hayu, haja tinuting wwangatuha, nahan ling Sang Sangaskara, kamuhan Sang Dhorakala, denya sih makawitan, putungku Sang Sangaskara, atyanta mahabharanta shakti bhakti makawitan, kita tulus maka sadhana ring rat ri pakinkin rahayu, den tulus magawe Dharmma, sakhalanta dadi janma, kaget repti haswagata nira, putungku Sang Sangaskara, bhageya punapa karyanta, tka kiteng dorasanga, ling ira Sang Dorakhala, sumahur Sang Sangaskara, kaki hyang dorakhala, hingsun datenga maring swargga, ri atmaning bapa ibu, kumirimakna caru, Suligidyus Kamaligi, lawan bubur sasuru, sunasungi sira, ya ta tarimanenira.
Rep hilang maring suksma mwah humangka ta sira, tka ta sira irika, kapanggih ta hawana mpu, binanjaran sarwwa skar, katemu ta lawangana gung, ika babahan sanga. Kapanggih sang megaduta, dorakhala mahashakti, hatunggu babahan sanga, sira ta mojaranambe, satinggal hyang dorakhala, tinghal nira kadita jurang madalem, dalaning maha wirawan, maha wirawan ngaranya, kanana nikang wot gombang, gumirih humembatembat, hanibakaken ta yeng jahat, yan tan winehan sajinya, prayatna Sang Sangaskara, hanibakaken ta ya saji kalawan bubur piratanya.
Kaki sang maha wirawan, wehana tang hulun hawan, wonten saji halunalun haranya, kahananing hanak bajang kawurahan, padha nangis akudawetan ring suku, padha hamalaku saji. Saprayatna Sang Sangaskara haweh bubur pirata, tumandang padha pati karundung, matunggalan ta ya wadhah, kang lawan bulu hamata mata pinaka wadhahnya, lungha pisah maluwaran.
Lumampah Sang Sangaskara, tan marmasuwe ring awan, tka sira ring lemah bang, kuwunging bhuta pishaca, yan shagana latajaya, haliman, ngko lan momg, hasu hajag, lawan ulung, singha barong lawan yaksha, halanghalang lawan dukut, we mangadang ring sira padha hamalaku saji, prayatna Sang Sangaskara, haniba nta saji, saji kang bubur pirata, neher sira aprayoga, ingidep haneng sharira.
Tan marma suwe ring hawan, tka ta sira ring ngalunalun, ring phapa ika, haja tinut kang mangidul, dalanikang sarwwa phapa, hidepe kang mareng swargga, tan weruh ta yen maring kawah, satkane mangke hirika, katon kang watek phapa kabeh, sesek kajejel ring Yamani, mwang pesu hiya manjing pinegatan saparanya, dening cingkarabhala, sang hasuha sang ya ta amburu sang watek phapa, hasu mahula wara rakusa, wadwa yaksha dipati, ya ta ambhurwi kang phapa, angrik ta ya hangama hama hanggraken maring kawah, dadya phada byuran, lumengwing kawah, tinujah ring shulabajra, pinetakaken ring canggah wesi, luludalucut hawak nika, mati yan tan mati sedeng mangedep paphanya hamanggih panchagati sangsara, menemah sadhakala, watek sangsara phapa kabeh, hana sempal, hana dawir, hana wungkuk, hana bujil, hana mala, hana mulu, iku kang dekahataken, apanulahe tan yukti, nahan ling Sang Dorakala.
Sumawur Sang Sangaskara, kaki hyang dorakala, hingsun prayatna sawuwusira, hingsun hamita mangkate datenge ring kadewatan, hana ta pahuduhira, lingira Sang Dorakala, iku dalan tutten denira, dalana ngidula ngetan, hasamun lumulumuten, sakurening sangka wulan, dalan lumut lamat lamat, ya ta tutenira, yeka dalan maring kadewatan mangkana ling Sang Dhorakala, hanuduhaken ning margga.
Tamiyan Sang Sangaskara, lumampah ta sira, les lungha ngetan lari nara, tan marma suwe ring hawan, stka nira irika, irika ta ring kawidadharen, kapanggih sang Dewanggana, sakaring kahyangan nira, dhateng ta sira mangadheg, ri harep Sang Sangaskara, satinggal Sang Sangaskara, neher hanembaha tumulya tatakon, kaki hyang hyang sapa sira rika tka kahandeg ni dalan ? Hingsun dateng maring swargga, mameta sang wongatuha, kumirimakna caru, suligidyus kumaligi, kalawan bubur pirata, sungakne tuha tuha, nahan ling Sang Sangaskara.
Sumawur sang Dewanggana, lingira putungku Sang Sangaskara, wahalawanta manehta, phapa sangsara bapanta, kaphapane bapanta, tan wruh ta yeng hila hila, haturu kalah wara hayu, khalayu danta, Khalacakra ngaranya, Prawani, Purnama, Panileman Budda, Tumpek, Ditemanis, iku kang den katresnaken, linenyokaken ning kawah bapanta.
Sumahur Sang Sangaskara , mangkana kapo pukulun lumampah dena glis, haywa kabet henggal henggal, aglis denya tka ring paran, hamita Sang Sangaskara mangkana ta sira hadulu ring margga, kalawan Sang Sangaskara Sang Dewanggana, lungha ngetan lari nira.
Tan marma suwe ring hawan, tka sireng Yamani, kahyangan Bhatara Yama, kapanggih Bhatara Yama, sakaring kahyangan nira, sira ta mojarana mbe satinggal Bhatara Yama, bhage ya ta ojar nira, ciha hahswagata nira, bhage ya Sang Dewanggana, dinaryyan, paran karyyanta marangke tkeng Yamani, ling hira bhatara Yama, tan salah tinuwus ta hangater putuning hulun, maka nama Sang Sangaskara, hameta wong ngatuhanya, maka nama Sang rat bhumi.
Hana ta huni ring kene sedeng humidep paphanya kang pancha gati sangsara, manembah Sadhakhala, tan weruh ta hakuri paranya mangke, hangrungu ta haku hanenggah wus, melesat kawitanta, sumengka dhatenging swargga, kang swargga hana ring madhya, swargganira Bhatara Shiwa, dene magawenta mangke lumaku magawe hayu, ring Shiwa padma mandhala, ling ira Bhatara Yama, mangerti kita sakareng, dwak warah kwehi kapaphan, lwirnya, hana hulun delenmata, phapa nira mabot sipat, hanapwa ya tan sinipat, ya ta wastuning hagama, mangananak para nanaknya, rarhamang doh hiku ngaranya, yeku kang hamanggih phapa, yan tan panut sisila kharmma, hana hanunggoken hanake, hamangan holihnya hutang, den tunggoken hanake, iku ta mangke den pangan, kalinganya ika phapa dahat, ika minalet bharanya.
Hana wwong hanggamel pattha, phapas ring malani, cinocoh raga neng tumpermlah sadakala, mhati ya tan mhati, sedenge mangidhap papahanya, hana wwong tibha kapati, phapane tan satyeng polah, nitya sangalap larangan laranganing wwong marabi, laranganing panhayakan, laranganing kakatengan, guru kaki, guru huwwa, guru rhama, guru mapaman, guru kakang, guru hari, tan pinilih mangke den para jugjug, hanganggo sapaweruha, iku kang liwating phapa, iku sinangsara dahat, denira Bhatara Yama, sikoknalanda purusya, sikon ta weda imob, mhati ya tan mhati, sedenge mangidep paphanya, hana ta wwong manuhu na wot, phapaning wwong hanglangkahi, padha ika phapanya, kalawan kang linangkuhan, muwa hana mahayu wot, padha ika phapanya, hana wwong wilut cangkeme, denya prasangga ring ujar ring guru, pituturing sabdha hayu, langgana ring wongatuha i Sang Reshi Shiwa Sogata, hana wwong hangkara dahat, hanglebur Dharmma Sang wiku, linggha harccha pranala, laka para pedheking bhumi, iku ta kang phapa dahat, hameta hayu tan ketkan, kang wwang hatampi kraraman, pirakrarama mapiraki ya, Drembhamoha mhurkka hartha, lumakwa ngalangajur, haneluh nitya ginawe, nitya mhati mhati janma, iku ta mangdadi tiryak, hatmahan tan waluyan dadi maring manusha, sakwehing mala den sandhang, sawetning gunge phapanya, mwah ke hangawakawak toya toya, ring dewata, tan pamuja tanpa banten, yateka phapa, matemahan binebed ta ya wwinlatung, tineke ta ya tinawurakna denira Bhatara Yama Brahma, tinawurkning manuh ri manuh, ring madhyapadha, matemahan dadi sato, maka sajihaning bhuwana, kagilagi laring jagat kadi tetek lintah, cacing kalawan kulir, hiris hirih spah dadinya halaku laku dhadha, bha ipadha, bha hupadha hatemahanya, salwiring molah mahambekan muni, sakwehing marhupa tiryak, wijung senggah lan manjangan, landak, tinggiling tinggalung, wiyung sarppa, jubel, lesit, mwang luluwe, hangge hangge, cakah cakah, ika maka dadinya, mwah kangalaku dhadha, saketi tahun lawasnya, mangdadi janma sangsara, kapindone dadi janma, hateher dadi manuk, nahida ta ngaranya, salaksa tahun lawasnya, kaping tiga ta lawasnya dadi janma, tumuluya dadi sato, kebo, sapi, hasu, celeng, catur padha ta ngaranya, sewu tahun ta lawasnya, kaping pat ikang mang janma, sumurup ta yeng manusha, sakalwiring mala den sandhang, nihan lwirnya, wudug lumpuh, bratengun kumeme, wuta tuli, wluh beser, manjakuming, sakweh nikang dasha mala kabeh padha kadukitanya.
Putungku Sang Sangaskara, weruh ta ngko ri kang phapa, kang tan phapa iki, hulah mabener juga, hingaran sujanma, tan hana ginawe magawe phapa, mijil saking awak tan satya shilayukti, kalinganiki wuwusku, haja kita tan hastu sasakareping dadi janma, kang nistha madhya mahottama, ya ta samapta mangkana, sawetuning titah tuwuh, haywa girang hingastuti, haywa sungsut yan cinale haywa girang yaning ngalem, hapan hana Sang Hyang Dharmma tumingkah, salwiring janma pratyaksha, lwiring hadatya sumengkwa hanungku bhawana, pinaka mata Bhatara Sang Hyang triyo dashaksara, telu welas kwehnya, ika supuluh rahina wengi, mulating yogya tan yogya, prayatna sawuwusku, nandhing bahatara Yama, sira ta ngucap prahestu.
Sumahur Sang Sangaskara, udhuh kaki Bhatara Yama, hingsun prayatnakna sabdhanira hala hayu, hingsun hamita mangka tadahenga ring swargga maya, lingira Sang Sangaskara, Ong Hyang Hyang kita bhaktenta, bhatara kinabhaktyanta, haywa kaki pinaksha, 3, haywa tan prayatneng dalan, mangkana lingira.
Lumampah Sang Sangaskara, lungha ngetan lari nira,tan marma swe ring hanghawan, dateng ta sira irikang bale pangangen angenan, kapanggih sira Sang Citragotra ring kahyangan nira, tumurun sira sakaring, tka ta sira hangadeg ring harep Sang Sangaskara, neher ta sira hatatakon ndah kamu Hyang Dewanggana, mari hangendi parananta, lungha ngetan kita madulur, wwong paran rikengarepta, handegakenta sakareng, warahta kami parananta, sumahur Sang Dewanggana.
Kaki sira Citragotra kami hangater putuninghulun, makangaran Sang Sangaskara, hangameta wwongatuhanya, maka kama Sang rat bhumi, hana rekweng swargga maya, patuduh Bhatara Yama, ya ta donku yan marengke, nahan ling Sang Dewanggana.
Sumahur Sang Citragotram anaku Sang Sangaskara, tan len kita tan waneh, haywa kita sangshaya, kami rowanganta datenge maring swargga maya patuduh Bhatara Yama, swargga hana ring madhya swargganing Bhatara Shiwa, mangke ta kami lumampah, les lungha ngetan lari nira, tan marma suwe maring hawan, dhateng ta sire rika, irikang bale pangarangan, mandeg ta sira rika, hangrungu prabhawa, kurunusumyuk swaraning gagana, kilat hawor genter ketug lindhu hujan raja, petengalisyu sahalilawar, iturun ira Sang Wilmana, tumurun saking swargga, hinutus dening bhatara, ya ta donira tumurun, hanungsung wwang gawe hayu, kang bhakti ring wwongatuha tuha, tka jeg sira mangadeg, ri harep Sang Sangaskara, neher sira hatatakon, ndi ta paranira Sang atma mangkana Sang Citragotra, makhadi Sang Dewanggana wwong paran rikengarepta, warah kami Dewanggana, mangkana Sang Citragotra.
Sumahur Sang Dewanggana, kaki sira Sang Wilmana, kaki sira pakshi raja, tan salah wuwus ta hiku, hangatarakna putungning hulun, makha nhama Sang Sangaskara, dhatenge maring swargga mhaya, hameta wwongatuhanya, kumirimakna caru, suligidyus kumaligi, kalawan bubur sasuru, sungakneng tuha tuha, nahan ling Sang Dewanggana.
Sumahur Sang pakshi raja, shabdanira tan panjang, mangkana ng ira ya wuwus, hah tan paweha hulun hawan, yan tan hana saji mami, sumahur Sang Sangaskara, udhuh kaki Sang Wilmana, paran teki saji nira, warahan tengsun kaki, dak warah saji mami, den hanake denta hangrungu, nihan lwirnya, bras sadhangan, grih rumahan rowangnya, kalawan lawe satukel, nguniweh kang pirak sata kalapa tunggal rowangnya, kagawa nehan telu roro, tape mwang skul sawungkus, tbu manggis ptang kerep, lepat bantal patpat, suruh rong puluh hawonawon, kalawan jahe sarihimpang sungakah rowangnya, tan kantunta les galuntung, pisang warangan satangkep, dodol salamba, mwang gula satangkep rowangnya, gendar kalawance sanggah, sajeng ring pucung tan kantun, bwang ping herong puluh jalu, chandana jaja kari, samono kwehi saji mami, mawuwus Sang Sangaskara, aparan pkananing saji muwah, saji punang ringanaken.
Dhuh mangke kita dak warah pakirnaning saji muwah, kunang pinaka padhamel, hapekik rupan ta tembe, kunang kala patunggal, minaka shirah, hantelu pinaka mata, bawang pinghe pinakontu, tape pinaka hotek, tebu pinaka lengen, bantal pinaka puphu lawan, wtis ha kalih, suruh pinaka jarijining tangan suku kalih, jahe munggwing dalamakan, cungbakah limwaning sakutun maka pusuh pusuh, tales maka hungsil, dodol ta pinaka lidah, hamanis ring pakcapan, lawenta pinaka husus, gula pinaka hredhaya, gender ta pinaka limpha, cacanggah pinaka tutud, pisang ta maka paparu, sajeng ta maka rudhira, chandana maka wanging ring dlahan, kunang hikang grih rumahan, pinaka helerku yen miber, nahan ling Sang garudha.
Sumahur Sang Sangaskara mangkana kapo pukulun, wonten kaki saji nira, saji genep nora kari ya ta tarima nira, sungana ta kami hawan, lah siki ta mangkana padandan, kita wedi yan pakanyuta, pada hiri panulum sakaring wunungku, nahan ling Sang wilamana.
Tatami yan Sang Sangaskara, padandan ta sira kanyut mawedihan maba hiri. Ri huwus sira mangkana, anulumpak sira mangkwa ri punukung Sang Wilmana, manganjali marep wetan, maweda mantra ngastuti, Ong Ung Ong legyatana hangati, walakaci, Ing ngkana hunggwan bhatara lawan bhatari, mangrangsuken Sanghyang Dharmma, Ong Ong Ong, hiritiriti salwiring teja sateja gunung mahuman, bhatara mwang bhatari, papupulaning watek dewata kabeh Ong Ong Ong, ya we namu namah swaha, samana linunjukaken denira Sang Wilmana, yeki mangke bhawanira, prabha wasyuh larap, genterbyusyuh mapancaka rungwing gagana, ghurnittantara, gumuruh tanpa rungwan, hiber ira Sang Wilmana, mengerang layang hangglunjuk, hana wang ring gagana, tke sire hangalang halang, ring halang halang ngaranya, patengahaning hakasha lawan Sang Hyang pretiwi, minduhur ta sira rika, tka sira Sang Sangaskara, sipi ramening swargga, tuminggal ta sira ngetan, hana swargga gumantung makambangan ring gagana, mangukur majamur lunjak, padha marahang salaka, sapa niskara padha putih harane ring Iswara padha, kahyangan Bhatara Iswara, holihing Sang satya bratta, dumunung sire rika, Bhatara Iswara hangganjari.
Humulat sira ngalor, tke ta swargga manggra hamuncar harjja tumpang pitu, hakirisa hakilamaya, sapa niskara padha hireng harane ri Wisnupadha, kahyangan nira Bhatara Wisnu, holihing Sang shura ring prang, satya hamriken tuhan, dumunung ta sira rika, Bhatara Wisnu hanganjari.
Satinggal ira mangulon, hana ta swargga masinang mahatep sarwwa kencana, sapa niskara padha kuning, harane ring buddha paddha, kahyangan Bhatara Mahadewa, holing hing Sang kretta phunya, buddhi swara lege manah, dumunung ta sira rika Sanghyang Mahadewa hanganjali, humula ta sira mangidul, hana ta swargga katon habra, hana ta graha tambaga, graha meru tumpang sanga, padha harahab tembaga, sapa niskara padha habang, harane ring Brahma padha, kahyangan Bhatara Brahma, holihing sang bisha hamuja, dumunung sire rika, Bhatara Brahma hanganjari.
Tuminggal ta sira ring madhya, hana swargga katon, lewih saking swargga kabeh mahatep tumpang sawelas, padha harahab kusuma, sapa niskara padha sekar, harane ring Shiwa padha, kahyangan Bhatara Shiwa, hulihing Sang wiku shakti pradnyan weruh mangaji, dumunung sire rika, Bhatara Shiwa hanganjari.
Mojar sira Sang Wilmana, putungku Sang Sangaskara, lah turun saking punungku, yateki harane ring swargga maya, kang swargga hana ring nadhya, swargga nira Bhatara Shiwa, lah wehen bapa ibunta, lingira Sang Wilmana. Tamiyan Sang Sangaskara, tumurun sira hirika, saking punuku Sang Wilmana, jeg tumurun Sang Sangaskara, dumunung ring swargga mhaya, kapanggih kawitanira genep mangke sajalu istri, makrak sira tke nangis, mangkana ling ira mpu hawu, ibu bapa lah yayahku tutur ling Sang Sangaskara, mojar sira Sang rat bhumi, sapa sira tke nangis, hingsung Sang Sangaskara wkanira Sang rat bhumi, saking toya padha tengsun, lumaku magawe hayu ring Shiwa padma mandhala, hatuduh ta sireng hawan, kang dalan hanuruweyan, tka ta ring kadewatan, hamon sira lalanaha, atinggalanakara, mata mangkesun malaksasana, dhateng mangke ring swargga mhaya, kapanggih ta sira khalih, halungguh ring swargga mhaya, kang swargga hana ring madhya, swargganing Bhatara Shiwa, sunanga ngaturaken caru, Suligidyus Kamaligi lawan bubur sasuru, mwah kang hiwak tok sekul, pangan kita sanginum, panarima samadaya, ibubuyut, kaki nini, nguniweh wamwa paman, ibu bapa bibi kakang, nguniweh hirining hulun, sakweh hikang kadang wargga, hamangana samadaya, hamangana hanginum ling ira Sang Sangaskara, amuja sira saha ngastuti, kalawan Sang Dewanggana, dalaning puja ginugon, ikiang shabda pageha ya kang ri negepira, ikang bayu shabda hidep, henak pangastutin nira, genta genti genteraken, umung humyung swara nika, widyadara widyadari padha manga ya piring sira, padha ngigel hawirama, sipi ramening swargga, hapupul sinangaskaran, bhinasman dina luwangan, parab sang sidda karuhun, maryaran guru pitara, kunang mangke haran parab, Sang guru suksma haran nira, apan sampun siddha pandhita, nugraha Bhatara guru, mojar ta sira tana panjang, anaku Sang Sangaskara, pawekasangkwi kita, pamulih kita ring toya pada, atuturing Sanghyang Dharmma, abhukti ring dewa puja, samadhi hanaken masku, papuja kita mabrata, panangreti pangan turu, kaprihanta ring dewa, prasiddha denta lumampah, hayo tan hambek mona, mhasih ring padhanta janma, buddhi swara lege manah, laksana dawanta muja, haywa tan bhakti ring wiku, ring rheshi sewa sogata, haywa tambra, hila hila, prayatnaken ta wuwusku.
Sumahur Sang Sangaskara, hingsun prayatnaken wuwus sira, hingsun hamita mantuka, mantuka maring madhya padha, mapagehaning tri bhuwana, angadeg ring habyantara, sumurup sireng kurungan, mulihing raga walunan nira, shampun margga lalana, dadi sira hurip muwah, amageh sira ring jagat, rep ta dadi heneng akna.
Iti putru Sang Sangaskara, ngaranya saking kina kina, midhartaken tingkahing magawe hayu, lwirnya, mamukur mwang hambaligya santurnya. Puput.
Tinurat denira, Ida Bagus Anom Putru Adhi ring Sanur stana desa, Denpasar, Bali. 13, ca, pwa, hugu, 1995, isaka, 1916, rah pha, teng, 12, sha, pha.
AMAN GATI HOTEL LAKEY PEAK
Our Rooms and Villa
Sea View Room
Start Rp 750.000/night
Stay in New Deluxe Sea View Rooms Aman Gati Hotel. Lets Check detail rooms
New Deluxe Sea View Room
Start Rp 850.000/night
Stay in New Deluxe Sea View Rooms Aman Gati Hotel. Lets Check detail rooms
Standard AC Rooms
Start Rp 550.000/night
Stay in Standard Air conditined Rooms Aman Gati Hotel. Lets Check detail rooms
The Blue House
Start Rp 1.200.000/night
Stay in The Blue House Villa Aman Gati Hotel. Lets Check detail rooms
The Big Beach House
Start Rp 1.400.000/night
Stay in The Big Beach House Villa Aman Gati Hotel. Lets Check detail rooms
The White House Villa
Start Rp 1.600.000/night
Stay in The White House Villa Aman Gati Hotel. Lets Check detail rooms
